GAUR festa giroan irekiko ditu ateak Hernaniko Gaztelekuak. Ariztizabal kaleko 5ean kokatua dagoen lokalean irekiera ospatzeko askaria eta musika izango dira. 17:00etan irekiko dira ateak.
Zerbitzua 12 eta 17 urteko hernaniarrei eskaintzen zaie. Zerbitzuan izen ematea besterik ez da behar bertan parte hartzeko. Neguko, udaberriko eta udarako eskaintza berezia antolatzen du, bertako ekintzetan parte hartzeko aurrez izena eman behar izaten da.
Antolatzen diren irteera eta ekintza berezien inguruko informazioa jasotzeko zerbitzua sare sozialetan jarraitzea
gomendatzen da: @hgaztelekua.
Gaztelekuak bi hamarkada daramatza herriko nerabeekin egiten den lana plazaratuz eta beren balioa azpimarratzeko erronkari eutsiz. Taldean egotea, aisiaz gozatzea, elkarrekin bizitzen ikastea, aniztasunean heztea, nerabeen parte-hartzea sustatzea, protagonistak izatea, harremanak euskaraz egitea... Hernaniko Gaztelekua lau hezitzaileko lantaldeak bideratzen du.
Aurtengo leloa da Hemen gu geu gara. Nire lekua. Nire jendea. Nire mundua. Lelo honekin azpimarratu nahi da gazteak beraiek direla zerbitzuko protagonistak, baita gazteei egokitutako zerbitzua dela ere.
Neska-mutilek parte hartzeko eta balioak garatzeko aukerak dituzte hezitzaile profesionalen laguntzarekin: gizartean murgiltzen dira, euren autonomia lantzen dute, besteekin egoten ikasten dute...
Eskaintza adin tarte desberdinei egokitzeko bi talde, larunbatean
Ikasturtea berrikuntzekin dator. Zerbitzua adin tarte zabal bati eskaintzen zaio, eta denei harrera egokia egiteko larunbat arratsaldeetako ordutegia moldatu da.
12-14 urte bitarteko gaztetxoek 16:30etatik 18:30etara izango dute gaztelekua erabiltzeko aukera. Eta 14 eta 17 urte bitartekoek jarraian, alegia, 18:30etik 20:30era.
Zerbitzuaren ordutegia asteartetik ostegunera 17:00-20:00 eta ostiraletik igandera 16:30-20:30.
Kontakturako bidea: gaztelekua@hernani.eus eta 943 33 32 12.