Jolasak, musika, talo-jana, animaliak... denetarik izan zen atzo, Euskal Jaien larunbatean, baina dudarik gabe, Kaxko elkarteak Portalondori egin zion omenaldia izan zen eguneko momenturik hunkigarriena, 100 urte betetzeagatik. Bertan elkartu ziren Landaribar-Urdanpileta familia (Portalondoren jabea), herriko musikariak, baita herritar asko eta asko ere.
Kaxko elkartearen izenean, beren lana «eskertu» egin zieten, eta «beste hainbeste irautea» opa zieten.
Beren aldetik, Arantxa Landaribarrek bere aitona izan zuen gogoan: «aitonak, dena ireki zuenean, ez luke inoiz pentsatuko halako omenaldi bat jasoko genuenik!». Malkoak begietan zituela, eskerrak eman zituen. Alde batetik, langileei «joan direnei, eta hemen daudenei». Eta bestetik, herritarrei: «denda bat ez da ezer bezerorik gabe». Bertaratuei esan zien: «omenaldia zuek merezi duzue!».
Eli Pagolak idatzitako bertsoa abesten bukatu zuten omenaldia, Kantuz, Ozenki eta Goiz Eguzki abesbatzaren eta herriko txistularien laguntzaz.
Dantza protagonista, gaur
Goizean, aurtengo nobedadea izango da: burduntzi txapelketa, Plazan. Eta arratsaldean, herria dantzan jarriko dute. 18:00etan, XXIV. Gazteen Dantza suelto txapelketa izango da, Kriskitina dantza taldearen eskutik. Ondoren, Tio Teronen semeak dantza taldeak, parranda eta euskal dantza uztartuko ditu, Tilosetan.
EUSKAL JAIAK 2018
GAUR, igandea
09:00, Diana, Txistulari Bandarekin.
10:00, XXXIX Pablo Lasa Artisau Azoka Plaza Berrin.
11:00, Sagardo-dastaketa Plazan.
11:30, Euskal Herriko burduntzi txapelketa Plazan.
12:00, XXI. Trikitixa txapelketa, Plazan.
12:00, Esku pelota eta pala txapelketa, Tilosetan. Euria eginez gero, frontoian.
18:00, XXIV. Gazteen dantza suelto txapelketa Plaza Berrin. Euria eginez gero, Biterin.
19:30, Tio Teronen semeak dantza taldearen umore emanaldia, Tilosetan: Festamentua.