Iritsi da eguna; gaur hasiko du 2018-2019 denboraldiko Heineken Liga Ohorezko Mailako errugbi taldeak. Bartzelonaren aurka izango du estreinako partidua gaur, eguerdiko 12:30etan hasita, La Foixardan.
Taldea, «indartsuago»
Indarrarekin abiatu dira hernaniarrak Bartzelonara, Ligako aurreneko partiduaren bila. Batetik, zaleen berotasuna jaso zutelako herenegungo aurkezpenean; eta bestetik, taldea ere hala dagoelako, Beñat Iradi kapitainak Kronikari azaldu zionaren arabera: «konpletoago dago taldea, jende gehiago postuko; horrek indartsuago egiten gaitu».
Gaur izango dute, ordea, aurreneko proba, eta orduan ikusiko du zalegoak taldea nola dagoen.
Bartzelona ere garaipenaren bila aterako da, aurreko urtekoari buelta emateko asmoz.
Puntuak etxeratzea, helburu
Aurreko urteetan baino lehenago salbatzea izango du aurten Hernanik, eta horretarako, puntuak eskuratzen joatea garrantzitsua izango da. Gaurko partiduan hori izango dute asmo; gutxienez, bonusen bat eskuratzea, sailkapeneko puntuak estreinatu ahal izateko.
Partidu zaila
Garaipena posible bada ere, zaila izango dute hernaniarrek. Etsita bukatu zuten katalanek aurreko denboraldia, eta dudarik gabe, horri buelta ematera joango dira aurreneko norgehiagokan, lehenbailehen ahazteko asmoz.
Zelai aldaketa, oraingoan
Nahiz eta La Teixonera izan Bartzelonako zelaia, azkenaldian jasan dituen erasoak direla-eta, aurreneko bi partiduak La Foixardan jokatuko ditu.