Kultur aniztasuna ikur, gastronomia eta arte kulinarioen ikasketek

Abiatu du ikasturte berria, Bas­que Culinary Centerreko sukaldaritza eskolak. Eta aurten unibertsitate ikasketak hasi dituen taldea, zortzigarren promozioa da, eskola estatu mailan aitzindari izan zenetik: Zientzia Gas­tronomikoen aurreneko fakultatea izan zen.
Orain, 400 ikasle inguru izaten dira urtero, graduko maila guztietan, BCCn ikasten dutenak: aurten, zehazki, 414 dira, 31 herrialde ezberdinetakoak. Eta hain justu, horixe du ikur eta bereizgarri, gradu honek: kul­tur aniztasuna. «Urtero elkar­bizitzen dute ikasgeletan, berta­ko ikasleek, estatuko gainerako tokietakoek, eta baita munduko hamaika txokotatik etorritakoek ere; nagusiki, Europatik eta Latinoamerikatik. Horrek berezitasun haundia ematen die ikasketa gastronomikoei, eta esperientzia unibertsitario aberasgarria ikasleei, elkarbizi­tza horretatik», nabarmendu dute BCCtik.
Denetik egin eta arlo asko jorratzen dituzte, gainera: esaterako, irteera profesionalak egiten dituzte, sukaldaritzatik harago doazenak. Ikasgaiei da­go­kienez, berriz, lantzen dituzte sukaldaritzaren bangoardiarekin, elikagaien industriarekin, berrikuntzarekin, negozioarekin edota ekintzailetzarekin lotutako gaiak, unibertsitateko irakasle eta sukaldaritzako profesionalen eskutik.

Ikasketak bukatzen dituzten gehienak, lan-mundura
Horrela, urtero 100 profesional berri ateratzen dituzte merkatura, eta horietatik ia %100a lan-mundura sartzen da; «%70a, gainera, zuzendaritza postuetan edota tartekoetan, oraindik gaz­teak izan arren», diote.
Modeloaren eraginkortasuna nabarmendu du Joxe Mari Aize­ga zuzendariak: «beti pentsatu dugu, garrantzitsua dela konbinatzea heziketa kualifikatu bat, ikasketa prozesua sendotuko duten ezagutza teoriko batzuekin, eta ikasleak modu azkar eta malgu batean lan-mundura txertatzeko prestatuko dituen heziketa praktikoarekin. Datuek bermatzen dute gure modeloa, eta erakusten digute, gure graduatuen garapen profesionala eta betetzen dituzten postuen aniztasuna», dio Aizegak.
Multidisziplinatasun hori, metodologia praktikoarekin ba­teratzen dute graduan, hain zu­zen ere. Aurreneko ikasturtetik egiten dituzte praktikak enpresetan; eta baita jatetxeetan edo gastronomiaren sektoreko en­presetan, nazionalak zein inter­nazionalak. Izan ere, 25 herrialde baino gehiagotako jatetxe eta enpresekin egiten dute lan.
«Horrela, ikasitakoa, mundu errealarekin kontrastatzen dugu aldiro; ikasleari bere ibilbide profesionalean lagungarri izan­go zaion esperientzia bat».