Mugikortasun jasangarriaren bidean, festa zein baliabide

Egitasmo bikoitza aurkeztu zuten mugikortasun ja­san­ga­rriaren bidean, atzo Herna­ni­ko Lanbide Heziketan elkartu­ta, ikastetxeko eta Udaleko ordez­kariek. Batetik, Mugikortasun Astearen berri eman zuten, da­torren astean ospatuko de­na Hernanin, hilaren 21etik 23ra. Eta bestetik, aurkeztu zuten bizikletentzako aparkalekua, ikastetxeko ziklo ezberdinek elkarlanean garatu dutena.
«Horrelako gauzak elkar­la­nean egiteak, aberastu egiten ditu. Elkarte ezber­di­nekin ba­te­ra antolatzen dugu Mugikor­ta­sun Astea; eta elkar­lanean aritu gara Lanbide He­zike­ta­re­kin, proiektu hau au­rrera era­mateko», azaldu zuen Esti Aldeiturriaga zinegotziak.

Mertxe Gomez mugikor­ta­sun teknikariak eman zuen, aur­tengo ekintzen berri. Ohi­ko ginkana egokituak emango dio hasiera ostiralean. Larun­ba­tean, Urbieta kalea itxita egon­go da, Karrerotik Marie­lu­tsera, Patin Festa ospatzeko. Ipar martxako ikastaroa eta ibilaldia izango da nobedadea, Atsegindegin. Beste berrita­su­na, igandean: emisio txikiko ibil­ga­iluen erakusketa jarriko dute, Zinkoenean: ibilgailu hibri­do­ak eta elektrikoak. Ez du hu­tsik egingo, Bizikleta Festak ere.

«Hezkuntza ere, kalera atera behar dugu»
Lanbide Heziketako ikasle eta irakasleek, bere aldetik, azal­du zuten animazioko, diseinuko eta fabrikazioko ikasleen lana izan dela bizikletentzako apar­kalekua: «polita da ikustea, egi­­ten duzun pieza horrek pro­iektu bat osatzeko balio duela, eta kalera dijoala. Uste dugu, hezkuntza ere, kalera atera behar dela». 8-9 bizikleten­tza­ko aparkalekuak jarriko dituzte, herriko lau tokitan. «Asmoa da, proiektu berriak garatzea Uda­larekin elkar­lanean, ildo ho­ne­tatik», aurreratu zuen Ainitze Blanco zuzendariak. 

MUGIKORTASUN ASTEA
IRAILAK 21, ostirala
17:30-19:30, Kirol egokituaren ginkana, Atsegindegin.

IRAILAK 22, larunbata
10:00, Patin Festako elkarretara­tzea, Plaza Berrin. 10:30etan hasiko dute ibilaldia.
10:30, Ipar martxako oinarrizko ikastaroa eta ibilaldia, Atseginde­gitik abiatuta; euria eginez gero, kiroldegian. Makilak utziko dizkiote, eskatzen dituenari.
11:30, Patin Festako ginkana, Urbieta kalean.
12:15, Patinatzaile trebatu eta txapeldunen erakustaldia, Urbieta kalean: slalom, saltoak...
13:00, Hamaiketakoa, Patin Festako partehartzaile guztientzat.

IRAILAK 23, igandea
09:30-12:00, Bizikleta ibilaldia, Atsegindegitik abiatuta.
09:30-12:00, Bide-heziketa zirkuitua, Atsegindegin.
10:00-14:00, Emisio txikiko ibilgailuen erakusketa: ibilgailu hibrido eta elektrikoak (autoak, motoak eta bizikletak). Zinkoenean. Horietako batzuk probatzeko aukera ere izango da