Bukatu da aurredenboraldia CD Hernaniko futbol taldeentzat, eta Ligari asteburu honetan emango diote hasiera klubeko hiru taldek: mutiletan, Nazional Jubenilek eta Ohorezko Erregionalek, eta emakumezkoetan Euskal Ligak. Aurrenekoak, jubenilak izango dira, gaur, 16:30etan Zubipen.
Tolosa gaur, Zubipen
Gaurko bi partiduetatik bakarra jokatuko da Zubipen: mutilen Nazional Jubenilena. Arratsaldeko 16:30etan hasita, Tolosaren kontra ariko dira.
Eguneko bigarren partidua, bestalde, Emakumezkoen Euskal Ligakoa izango da. Hauek, ordea, etxetik kanpo hasiko dute denboraldia: 18:00etan Karla Lekuonan ariko dira, Oiartzunen kontra.
Ohorezko Erregionalak bihar, kanpoan
Denboraldiari hasiera asteburu honetan emango dion hirugarren taldea mutilen Ohorezko Erregionalena izango da. Hauek ere kanpoan jokatuko dute, bihar. Arratsaldeko 17:00etan hasita, Hondarribiaren kontra ariko dira, Ondartzako zelaian.
Bazkide egiteko, garaiz
Futbolariak lanean jarrita, jarraitzaileak ere martxan jartzeko epea ireki du CD Hernanik; irekita dago bazkide egiteko epea, hain zuzen.
Hiru bide daude horretarako: www.cdhernani.com/eu/bazkideak webguneko formularioa beteta, Miguel Lujanbiori izenemate orriak eskatuta (Plaza Berriko izkinan, egunero, 11:00-13:00) edo gizonezkoen lehenengo taldeko aurreneko bi partiduetan. Behin ordainketa eginda, txartelak ere toki horietan lortu ahal izango dira. Helduen kuota 80 eurokoa da; jubilatuena, 40koa; eta gazte eta langabetuena, 20koa.