Zita berezia jarri dute irailaren 30ean, Orona Fundazioak eta Albaola Itsas Kultur Faktoriak: kontzertu solidarioa antolatu dute Albaolan, Tenpora taldearekin, Salvamento Marítimo Humanitario (SMH) GKEari laguntzeko. Asteazkenean aurkeztu zuten, Orona Fundazioaren egoitzan.
Arratsaldeko 19:00etan hasiko da kontzertua, eta ondoren, luntxa ere eskainiko dute. Bertan egoteko, eserlekuak erreserbatu daitezke, borondatezko donazio bat eginez, interneten: www.lankor.eus/ tenpora_concierto_solidario. Batezbeste, 10 euro jaso nahi dituzte eserleku bakoitzeko, itsas salbamendukoentzako. Kontzertura joaterik ez duenak ere, aukera dauka donazioa egiteko.
Greziako Chioseko errefuxiatu-eremuan ari da SMH, iritsi berri direnei arretaz arduratzen; eta orain, Libiako kostaren aurrera erreskate ontzi bat eraman nahi dute. Itsasontzi hori ia bukatuta daukate, eta litekeena da, «kontzertuaren egunerako ontzia Libiako kostaren aurrean egotea», azaldu zuen Iñigo Gutierrezek, GKEaren presidenteordeak, aurkezpenean. «Oso pozgarria da horrelako ekimenak ikustea, eta erakusten du, gipuzkoar gizartea zein solidarioa den», nabarmendu zuen.
«Itsasoa ametsa izatea nahi dugu, eta ez amesgaiztoa»
Oronako Iñigo Marquetek jakinarazi zuen, «oso lankidetza harreman polita» daukatela Albaolarekin, eta adierazi zuen, beraien lana ezagutaraztea dela, Salvamento Marítimo Humanitariori laguntzeko modurik onena. Albaolako kudeatzaileak, Erme Pedrosok, adierazi zuen: «guretzat ametsa da itsasoa, eta hala izaten jarraitzea nahi dugu; ez amesgaiztoa, jende askorentzat izaten ari den bezala».
Tenpora taldeko Elene Arandiak eta Juantxo Zeberiok, azkenik, nabarmendu zuten onena litzakela horrelako kontzertuen beharrik ez izatea, baina ederra dela proiektu honetan lagundu ahal izatea: «guk joko dugu, baina salbamendukoak eta amesgaizto hori bizitzen ari direnak dira protagonista».