Orain arte Baietz Hernanik! egitasmoarekin bat egin duten erronkalarien errepasoa egin zuen atzo, Euskara Ari Du taldeak, eta urtea bukatu bitartean egingo diren ekimenen berri ere eman zuen.
Era berean, gogorarazi zuen oraindik ere badagoela aukera, erronkaren bat hartu eta euskerari eusteko konpromisoarekin bat egiteko.
1.000 lagun, helburu
2016 urtearen bukaeran sortu zen egitasmoaren hazia. Ordukoan, hilabete eta erdiko desafioa egin zitzaion Hernaniri, euskerari eusteko. Urte honen hasieran, berriz, otsailean, urtebeteko erronkari eman zitzaion hasiera, Leire Otxotorena dinamizatzaileak atzo azaldu bezala: «ohiturak aldatzea da helburua, eta horretarako, hilabete eta erdi ez da nahikoa». Horregatik jarri zen martxan Baietz Hernanik! urtebeteko erronka.
Ordutik gaur arte, 750 erronkalarik hartu dute konpromisoa euskerari eusteko. «Bi parte-hartzaile mota daude: euskaldun osoak, dena euskeraz egiteko gai direnak; eta ulertu bai, baina hitz egiteko gai ez direnak. Bien ekarpenak berebiziko garrantzia dauka». Azken batean, nork bere ohiturak aldatzea da helburua, dakienak euskerari eutsiz, eta ez dakienak, berarekin euskeraz egiteko eskatuz. 11 hilabetetan 11 erronka hartu dituztenak badira, baita 2-3 hartu dituztenak ere.
Zentzu horretan, herriko eragile guztien laguntza nabarmendu zuen: Udala, ikastetxeak, Dobera, Kronika, kirol taldeak, Ttarla, Musika Banda, Txistulari Banda, euskaltegiak... Eta oraindik, erronkalari izateko izenematea irekita dagoela gogorarazi zuen, Biterin, www.euskaraaridu.eus webgunean, edo Larramendi 11ko bulegoan; helburua, 1.000 erronkalarira iristea.
«Bi parte-hartzaile mota daude: euskaldun osoak eta euskeraz ulertzen dutenak. Bien ekarpenak berebiziko garrantzia dauka»
Lan munduan ere, erronkalariak
Erronkalari izatera animatu diren berrienak, Orona, Mitxelena tailerrak eta Iturola Co-working Gunea dira, hain zuzen.
Mitxelena tailerrek Bai Euskarari ziurtagiria lortu zuten orain gutxi, eta erronkalari izatera animatu dira. «Denak gara euskaldunak, eta bultzatzeko gaude».
Iturolatik, Maitane Ormazabalek azaldu zuen hilaren bukaeran agenda kulturala jarriko dutela martxan, eta hortxe helduko diotela erronkari. «Erronka kolektiboa hartu nahi dugu».
Oronako Ainitze Etxeberriak, berriz, azaldu zuen Euskara Plana martxan dutela, baina egitasmoarekin bat egin nahi izan dutela: «Hernaniko parte sentitzen gara. Orona Hernaniko auzo bat da, eta horrela azaldu diegu langileei». Euskera sustatzaileek animazio saioak egiten dituzte hilero Oronan, eta haiek langile gehiago animatzea jarri dute helburu.
Umore antzerkia eta gehiago, azken txanpan
Euskeraren Egunaren bueltan bukatuko da erronka, eta ordura arte, azken txanpa indartzeko kultur ekitaldiak ere antolatu dira, osteguneko antzerkiarekin hasita; Bakean dagoena, bakean utzi.
Irailak 13, Bakean dagoena, bakean utzi antzerkia, 20:30etan Biterin, Mirari Martiarena eta Idoia Torregarai aktoreekin. Berdintasun Sailarekin elkarlanean.
Irailak 22, Kale erronka animazioa, Hatzi-K taldearen laguntzarekin, Miren Gojenolak eta Mikel Laskurainek gidatua. Ekitaldi parte-hartzailea.
Irailak 27, Ander Txintxurretak gidatuta, mahai-ingurua bi kirolarirekin; bat, Izaskun Zubizarreta eskiatzailea.
Urriak 7, Ari du abestiaren aurkezpena Milagrosan: Maite Larburu eta Andoni Tolosa Morau, abestiaren egileei elkarrizketa, haien kantuak tartekatuta.
Urriak 17, Amalia Barquinen hitzaldia. Generoa eta euskera.
Azaroak 29, Mintzodromoa Udal Euskaltegiarekin lankidetzan.
Abendua, amaiera festa, kantu bazkaria.