Beste ikasturte batez, hainbat ikastaro antolatu dituzte aurten ere, Jabetze Eskolen barruan. Irailaren 28an emango diote hasiera kurtso berriari, kontzertu batekin: Leokako labaderoan joko du Duo do Portu bikote hernaniarrak, gaueko 22:00etan hasita; euria eginez gero, 29ra pasako dute.
Zortzi ikastaro izango dira aukeran, ikasturte honetan. Horietako bat, Mindfulness izenekoa, kontzertua baino lehen hasiko da, irailaren 25ean, eta azaroaren 13ra bitarte egingo dute, asteartero. Munduko emakumeen literatura, berriz, urriaren 4an hasiko da, eta ostegunetan emango dute, zortzi saiotan. Urriaren 19an hasiko dituzte Batukada Feministaren saioak, ostiraletan. Eta urriaren 31tik abenduaren 12ra izango da, asteazkenetan, Konfiantza indartzeko bidea; norbere ardatzetatik jarduteko estrategia izenekoa. Gainerakoak, saio bakarrekoak edo bi saiotakoak izango dira: Emakume musulmanen eta ez musulmanen arteko topaketa, azaroaren 9an; Ekonomia feminista, azaroaren 12an; Eta martxoaren 8a eta gero zer?, azaroaren 20 eta 29an; eta Feminismo Islamiarra, abenduaren 14an.
Guztietan izena emateko, irailaren 10ean zabalduko dute epea: Plaza Feministan (Aristizabal kalea 7), 943 33 70 17 edo berdintasuna@hernani.eus. Informazio gehiagorako ere, hiru bide horiek aukeran.