Berezi xamarra jarri diote izena, baina ez dago joko arrarorik izen horren atzean: Melokotoi Txapelketa jokatu zen larunbatean, aurrenekoz, Zizurkilen; eta bertan izan zen Hernani ere, Emakumezkoen Euskal Ligako taldearekin. Izan ere, emakumezkoen errugbi topaketa da, Elbarrenako Jaien atarian antolatu dutena. Guztira, bost talde aritu ziren jokoan, Danena futbol zelaian: Hernani bera, Ordizia, La Unica, Bilboko UBR eta Bera Bera.
Bazkide kanpaina, martxan
Txapelketa horrekin, aurredenboraldiko prestaketekin jarraitu du Hernanik. Eta denboraldi berrira begira, bazkide kanpaina ere martxan dauka errugbi elkarteak: kolaboratzaile (30 euro), abonatu (60 euro) edo enpresa laguntzaile (240 euro) egiteko aukera dago.
Horretarako, Landaretik pasa behar da, astelehenetik ostegunera (18:00-20:00); edo internet bidez ere egin daiteke aurten, www.hernanirugby.eus/denda helbidean. Ordainketa egiteko, berriz, kontu korronte zenbakia eman daiteke, edota dirua sartu, elkartearen kontu korrontean: Rural Kutxa 3008 0170 18 1033933928.
Abonatu egiten direnek, ez dute sarrerarik ordaindu beharko partiduetan; kolaboratzaile egiten direnek bai. Baina guztiak sartuko dira bazkari baten zozketan; eta partidu guztietan, sarrerarekin batera, Adarraga gozotegiko tartaren zozketarako zenbakia ere banatuko dute.