Lagunarteko giroan pasa dute asteburua CD Hernaniko futbolariek; lagunarteko partiduak jokatzeaz gain, Arbuciesekoen bisita jaso zuten.
Senidetutako bi herri
Preferente mailako mutilen taldeak Arbuciesen kontra jokatu zuen larunbatean. Senidetutako herriak dira Arbucies eta Hernani, eta horregatik, partidua bukatzean, oroigarriak banatu zizkieten elkarri. Bi futbol elkarteetako jokalari eta lehendakariez gain, bertan izan ziren Hernaniko Udaleko kirol eta gazteria zinegotziak ere; Esti Aldeiturriaga eta Garazi Etxarri.
Bestalde, CD Hernanik berak sare sozialetan azaldutakoaren arabera, jokalari ohi asko ere gerturatu zen Zubipera, eta «oso pozgarria» izan zen elkartearentzat.
Eguna, bazkari baten bueltan borobildu zuten.
Ohorezko maila, Ligarako prestatzen
Preferenteen partidua bukatuta, Ohorezko Mailako taldeak Mutrikuren kontra jokatu zuen aurredenboraldiko azken partidua, eta bana berdinduta bukatu zuten.
Aurreko asteburuan Beasainen aurrean 3 eta 0 irabazita, Ligarako prestatzen ari da taldea. Asteburu honetan hasiko du, Hondarribiaren kontra.
Euskal Ligakoak ere, prest
Azkenik, emakumezkoen Euskal Ligako taldeak ere atzo jokatu zuen azken lagunartekoa; 1 eta 0 galdu zuen Goierriren kontra. Hauk ere asteburuan hasiko dute Liga, Oiartzunen kontra.