Irailaren 21etik 29ra egingo da Donostiako Zinemaldia, eta tartean, Culinary Zinema saila. Donostia Zinemaldiak eta Basque Culinary Centerrek antolatzen dute elkarlanean, Berlingo zinema-jaialdiaren laguntzarekin.
Aurten, zazpi pelikula eta horietan oinarritutako zazpi afari proposatu dituzte; Argentina, Espainia, Frantzia, Hego Korea, Japonia, Kanada eta Singapurreko gastronomiarekin lotutako istorioak biltzen dituzte film horiek, eta Espainiako zein nazioarteko hamabi sukaldarik prestatutako afari banarekin lagundu ahal izango dira istorioak. Familiako jatetxeak, artearen eta gastronomiaren arteko uztarketa eta oliba-olioaren kultura izango dira protagonista, eta sukaldaritzako genero-ikuspegia, jatorriaren bilaketa edo ekintzailetza ere lantzen dituzte.
Saila ixteko ‘Bihar dok 13’ jarriko da; BCCko ikasleek Gaur eta Ez Dok Amairun oinarritutako platerak sortuko dituzte.
Sarrerak, afariarekin edo gabe
Sarrerak, pelikulen emanaldi eta afarietarako, gaur bertan jarriko dira salgai, 70 euroan, www.sansebastianfestival.com webgunean edo Kutxabanken.
Pelikulak ikustera bakarrik joateko sarrerak, hilaren 16an jarriko dira salgai, 7,90 euroan.
Zazpi aukera
Culinary Zinema saila Tegui: un asunto de familia pelikulak irekiko du, eta itxierarako, Bihar dok 13 jarriko dute; Basque Culinary Centerreko ikasleek platerak sortuko dituzte, duela 50 urte arte eta musika munduak eraberritu zituzten Gaur eta Ez Dok Amairu mugimenduetan oinarrituta.
Tartean ikusi ahal izango dira Jaén, virgen & extra, Little forest, Ramen Shop, The heat: a kitchen (r)evolution eta Y en cada lenteja un dios.