Trikitixa eta panderoarekin berdinik ez dutela erakutsi dute beste behin Eider eta Lierni Tolosa ahizpek. Abuztuaren 15ean Zeanurin jokatutako Euskadiko Trikitilari Gazteen XXXVII. Txapelketan txapeldunak izan dira, 131,70 puntu bilduta.
Alde txikia, baina agerikoa
Parte-hartzaile guztiek lau pieza jo zituzten: jotea, porrusalda, fandangoa eta arin-arina. Eta lan hori baloratzeko epaimahaia osatu zuten Soraia Agirregoikoak, Idoia Makazagak, Ainhoa Agirrezabalak eta Roberto Etxeberriak.
Jotea, porrusalda, fandangoa eta arin-arinak jo zituzten bikote guztiek.
Tolosa ahizpek guztira 131,70 puntu bildu zituzten, eta horrek eman zien txapela. Gertu izan zuten, hala ere, bigarren sailkatutako bikotea: 129,95 puntu jaso zituzten Zumarragako Andoni Oruesagastik eta Uxue Kerejetak. Alde txikia izan arren, hernaniarrak izan ziren txapela merezi izan zutenak.
Hirugarren saria ere bazen: 120,90 punturekin, Aretxabaletako Dorleta Urkia eta Arrasateko Mirari Plazaola izan ziren podiuma egin zutenak.