Nafarren arteko lehia izango da Buruz Buruko Kutxabank erremonte Txapelketako finalerdia: Urriza eta Endika izango dira aurrez aurre gaur Galarretan, 16:00etan hasita jokatuko diren partiduetan bigarrenean.
Lortuz gero, Urrizarentzat segidako zazpigarren finala litzateke; Endikarentzat, berriz, aurrenekoa.
Bien artekoa ahaztu nahian, Endika
Pixkanaka, bere ohiko mailara iristen ari da Urriza, eta horri eusten badio, finalera pasatzeko bakarrik ez, finala irabazteko faborito ere izango da. Segidako zazpigarren finala luke, eta 2014an kenduta, denak irabazi ditu.
Endikak, berriz, aurreneko finala luke, eta horixe lortzeko, sopresa ematen saiatuko da gaurkoan. Horretarako, Urriza eta bien arteko azken partidua, lehengo larunbatekoa, ahaztu beharko du. Izan ere, ordukoan estu hartu zuen Urrizak, eta 14 eta 11kora iritsi arte eutsi bazion ere, 30 eta 12 irabazi zion, azkenean.
Ostegunean aukeratu zituzten pelotak, eta gustora geratu ziren bi erremontistak; orokorrean, 128 eta 129 gramo arteko materialaren alde egin zuten. Irabazleak, irailaren 8an jokatuko du finala, Utergaren kontra.
Barrenetxea gaur, hirugarrenean
Txapelketatik kanpo, baina jokoan jarraitzen du Barrenetxea IV hernaniarrak. Gaur, hirugarren partiduan jokatuko du, Urtasunekin, Uterga eta Azpirozen kontra.