Ikusgarria eta sorpresaz betea izan zen atzoko Kontxako Banderako emakumeen sailkatze-estropada. Liga bukatuta, dena ematera ateratzen dira traineruak, iraileko aurreneko bi igandeetan Banderaren bila atera ahal izateko.
Hala egin zuen atzo Hernaniko Maialen traineruak, baina ez zuen lortu. Azkeneko bi urteetan ez bezala, aurten ez da Kontxan izango. Hamasei traineruk jokatu zuten sailkapena, erlojupean, eta hamabigarren izan ziren hernaniarrak. 06:12,00 denborarekin egin zuten aurreneko ziaboga, eta 12:01,10 denborarekin bukatu zuen estropada.
Riveira, aurrenekoa; San Juan, atzetik
Bi ezustekorekin bukatu zen emakumezkoen sailkatze-estropada atzo. Aurrenekoa, Riveira talde galiziarrak eman zuena; Kontxako estreinakoan, azkarrenak izan ziren: 05:53,00n hartu zuten ziaboga, eta 11:17,02ko denborarekin bukatu zuten.
Haien atzetik geratu ziren San Juango ‘Batelerak’, azken urteetako garaileak, galiziarrak baino 12 milaren gehiago bakarrik eginda.
Bigarren sorpresa Tolosaldeak eman zuen, garailetik 23 segundora, azkeneko txartela lortu zuen. Kontxako Banderaren lehiatik kanpo geratu ziren, ordea, Hondarribia eta Deustu.