Lagunarteko partiduekin lanean hasiak dira CD Hernaniko hainbat futbol talde. Emakumezkoen taldeak asteartean galdu egin zuen, 3-0, Zarautzen kontra, eta igande honetan Goierriren aurka jokatuko du hurrena, 17:00etan, Beasainen.
Orain martxan jarri nahi dituztenak, berriz, jarraitzaileak dira, eta elkarteak bazkide kanpaina jarri du martxan, horretarako.
Bazkide egiteko hiru modu
CD Hernanik hiru bide jarri ditu, futbol elkarteko bazkide egin ahal izateko.
Batetik, webguneko formularioa beteta: www.cdhernani.com/eu/bazkideak. Bestetik, gizonezkoen lehenengo taldeko aurreneko bi partiduetan, partidua hasi aurretik, izena emanda. Azkenik, Miguel Lujanbiori izenemate orriak eskatuta; Plaza Berriko izkinan (Irizar) egoten da egunero, 11:00etatik 13:00etara.
Kuota 80 eurokoa da helduen kasuan; 40 eurokoa, jubilatuen kasuan. Gazteei 20 euro eskatzen zaizkie, eta langabetuei ere bai.
Txartel berriak Miguel Lujanbiok berak banatuko ditu, edo mutilen lehenengo taldeko aurreneko partiduetan eskatu ahal izango dira.
Mutilek ere partiduak, asteburuan
Mutilen taldeei dagokienez, Ohorezko Mailakoek Mutrikuren aurka jokatuko dute larunbat honetan Zubipen, 12:00etan, lagunartekoa.
Aurretik, goizeko 10:00etan preferenteek jokatuko dute, Arbuicesen kontra. Hernani senidetuta dago Arbuices herriarekin, eta, beraz, Udalak harrera egingo die Arbuicesetik etorriko diren zinegotziei. Partidua bukatzean ere, 11:45etan, oroigarriak banatuko zaizkie. Bazkaria egingo dute gero.