Hirugarrenez neurtuko dituzte indarrak, Buruz Buruko Txapelketa Nagusiaren final batean, Javier Urrizak eta Xanti Utergak. Larunbatean izango da hori, 16:00etan hasita Galarretan. Iaz topatu ziren azkenekoz, eta orain hiru urte, estreinakoz. Bi finalek izan zuten bukaera berdina: Urriza izan zen txapeldun, beste hiru alditan bezala; azkeneko sei finalak jokatu ditu, eta horietako bost irabazi.
Beraz, helburua garbi dauka Utergak, istorioa aldatzea. Eta horretarako, gaur bertan eman beharko du aurreneko pausoa, material aukeraketan. Eguerdiko 12:30etan jarri dute zita, Galarretan, finalean erabiliko dituzten pelotak aukeratzeko.
Ondoren, txapeldunen bazkaria egingo dute, Suharri jatetxean. Bertan egongo dira, Buruz Burukoaren txapeldun izandakoak: Intxauspe, Eizagirre, Matxin II, Aizpuru, Agerre, Mujika I, Ezkurra, Zeberio, Lizaso eta Urriza.