Urnietarra da berez Fernando Santibañez, baina Hernanin bizi da duela urte asko; bere jaioterrian jarri zuen aurreneko erakusketa, gazte zela: «hori izan zen paisaiak besterik ez nituenean margotzen».
Orain, ordea, asko aldatu da bai bera, eta baita bere lanak ere, eta Hernanin jarri ditu lanak aurreneko aldiz: «asko etortzen naiz Biterira, gustatzen zaidalako ikustea kaleko jendeak egiten duena. Eta halako batean gogoa piztu zitzaidan, nire lanak elkartu eta jendeak ikustekoa, ea zer-nolako harrera duten».
Hilaren 24ra arte egongo dira ikusgai Satibañezen margolan eta eskulturak. Arratsaldero izango da Biteriko areto nagusian, 17:00etatik 20:00etara bitarte.
Ehundik gora lan
Erakusketa osatzeko ehundik gora lan elkartu ditu, guztiak azken 2-3 urteetan egindakoak. Bere lanen artean «aniztasun haundia» dagoela onartzen du, eta hain zuzen, estilo ezberdinak ikusteko aukera izango da bertan.
«Amestea gustoko dut, eta horri jarraitzen diot, unean-unean nahi dudan horri», onartzen du. Momentu jakin batean «bihotza ukitzen didan horrek eramaten dit mahai baten gainean eseri eta sortzera».
Esate baterako, margolanen kasuan, orain «gizarteari kolorea falta zaiola uste dut, eta horregatik, koloreztatu egiten ditut nire margolanak».
Baina ez hori bakarrik: «ez naiz fededuna, baina elizak asko gustatzen zaizkit, eta beti bisitatzen ditut, eta kutsu hori nahi gabe nire lanetan transmititzen dut». Baina berak uste du horiek aldatu daitezkeela, eta noski, bere lanetan eragina izan dezakeela.
Arte kontzeptuala
Eskulturei dagokienez, arte kontzeptuala deritzon mugimenduaren barruan daude: «eskultura bakoitzak azalpen bat dauka». Eta horiek azaltzeko prest izango da Santibañez bera, hilaren 24ra arte.