Korrika hasten dute askok Ergobiako jaien martxa, larunbatarekin, Ergobiako Krossean. Atzo osatu zuten, hain zuzen, XI.edizioa, 64 partehartzailerekin. Horietatik azkarrenak Aitor Regillaga tolosarra eta Martina Aldaia donostiarra izan ziren, gizonezko eta emakumezkoen kategoriatan, hurrenez hurren.
Bigarren txapela du Regillagak Ergobian; aurten, 00:30:06eko denbora egin du, iaz baino segundo batzuk gehiago (2017an, 00:29:22). Aldaiak, aldiz, 00:40:25etan osatu zuen 10 kilometroko ibilbidea.
Haien atzetik iritsi ziren Raul Gomez eta Jon Trigueros, gizonezkoetan; eta Iosune Alberdi eta Arantxa Atxukarro, emakumezkoetan.
Ohitura den bezala, aurreneko bi ergobiarrek ere saria jaso zuten: Izaskun Aranburuk eta Harkaitz Galarragak, hain justu.
Sagardoa nonahi, gaur
Sagardoaren eguna izango da gaurkoa, eta denera, 20 bat sagardogile lehiatuko dira txapelaren bila. Txapelketa 11:30etan hasiko den arren, probaketa irekiari 12:00etan ekingo zaio.
Arratsaldean, haurrentzat Txantxariak ikuskizuna izango da 17:00etan, eta ondoren, herri kirol erakusketak beteko du Ergobiko plaza.
GAURKO EGITARAUA
Sagardo Eguna
10:30, Meza Nagusia Astigarragako elizan, auzoko hildakoen omenez.
11:30, LVII Sagardo Lehiaketa. Denera 20 bat sagardogile izango dira plazan. Nahi adina sagardo probatzeaz gain, pintxoak ere izango dira. Probaketa beti bezala 12:00etan hasiko da Plazan.
17:00, Txantxariak. Dantza, kanta eta animazioa, gidari dinamizatzaileekin euskeraren erabilera kalean gehiago indartzeko xedearekin.
Yalderen eskutik, etxeko izozkiak eskainiko dira ume guztientzat.
19:00, Herri kirolak. Momentuko harri txikien harri-jasotzaile onenen arteko VI. txapelketa izango dugu Ergobiko 104 kg harri baldarra tarteko dutela. 100 euroko gainsaria izango du altxaldi marka puskatzen duen orok.
21:00, Afaria plazako karpan. Eta gau giroa animatzeko, Cubatik espreski etorritako Duo Jade bikoteak beren kantak ezagutzera emango dizkigu. Kostillada; menua: entsaladilla rusa, langostinoak, txekor kostilla, edariak, limoi sorbetea, pastelito sorta eta kafea.
Prezioa: helduek, 23 euro; umeek, 12 euro.