Ate irekiak, etzidamu

Ateak irekiko ditu berriro ere asteartean Artikutzak, San Agustin egunean. Urte osoan zehar izaten da aukera urtegia bisitatu eta inguruan oinezko buelta egiteko, baina festa egun honetan, baimenik eskatu gabe kotxean bertara gertu­ra­­tzeko aukera izaten da. 

Ho­rrez gain, egun osoko egitaraua prestatzen du Donostiako Udalak.

Azoka eta festa giroa
Egitarauaren hasiera, goizeko 11:00etako mezak jartzen du, baina lehenagotik, 08:00etatik aurrera, irekita egongo da urtegia, eta jan-edanerako postuak eta azoka izango dira.

Mezaren ondoren, 11:30e­tan, pelota partiduak jokatuko dira frontoian. Festak arra­tsaldean segiko du, 17:30etan egingo den herri kirol erakustaldiarekin. Harria jasotzen ariko da Haimar Irigoien; txin­­gekin, Xanta Sousa; eta aizkoran ariko dira Aitzol Atu­txa, Ugaitz Mugerza, Donato Larretxea eta Iker Bizente.

Ondoren, 19:30etatik aurrera, festa bukatzeko dantzaldia izango da.

Goizuetako lurretan barrena
Festa egunaren antolatzailea Donostiako Udala da, hain zuzen, Donostiaren jabegokoa delako Artikutza, baina Goizu­e­tako lurretan dago.
Guztira, 3.700 hektarea in­guru dauzka, eta 11 kilometro eta erdiko oinezko bidea egin daiteke urtegiari buelta emanez;  gehiena, basoan zehar. 

Normalean, Eskas Guarde­txe­an hasten da ibilbidea. Ko­txe­a­rekin sartu ezin denetan, hau bertan utzi, eta oinez, as­fal­tozko bidean behera egin be­har da, 400 bat metrotan, eta ge­ro, ezkerretara hartu, Arti­kutza markatzen duen tokian. Pa­goen itzalpean egurrezko zu­biraino iristen da, eta hau zeharkatuta, eskubira, Erroia­rri­ko miradorera iristen da. Bi­de­ak, berriz, ezkerretik segi­tzen du, hesi batera iritsi arte, eta han, berriro ezkerrera egin behar da, urtegira iritsi arte. 

Hesira bueltatu, eta bideari jarraituta, herrira iristen da. Fron­toia pasa, eta errioaren bes­taldera pasa behar da, zubi gainetik. Errepideak Ostatu Za­har  baserrira egiten du, eta 100 bat metrora, errepidea utzi eta eskubira egiten duen bidea hartu behar da, Eskas seinaleari segika. Pintura horiari ja­rrai­tu, eskubitara egin, eta tren­bide zaharraren bidetik, erro­tarri handi parea dagoen lekura iristen da. Handik errepidera atera, eskubira egin, eta hasierara iristen da.