Atzera kontaketa hasi da eta seguraski, taldeak dagoeneko hasi dira beroketa-lanekin. Izan ere, larunbatean jokatuko da, beste behin, dispertsioaren aurkako Futbol 7 Txapelketa. Talde askok dagoeneko eman dute izena, baina oraindik bada aukera, azken momentuko fitxaketak egiteko.
Horiek, azken momentukoek, Garin tabernan edo sare sozialen bidez eman dezakete izena, Facebooken edo Twitterren. Hiru aukera daude, larunbateko jardunaldian parte hartzeko: txapelketan parte hartzea (10 euro); txapelketan eta bazkarian parte hartzea (15 euro); edo bazkarira bakarrik gerturatzea (10 euro).
Egitarau konpletoa, egun osorako
Goizean goizetik hasi, eta egun osorako plana egin dute larunbaterako, urtero bezala. Goizeko 08:30etan jarri dute zita Zubipen, taldeak osatzen hasteko, eta 09:00etan hasiko da txapelketa. Tartean, zenbaki batzuk banatuko dituzte, eta finala baino lehen, zozketa egingo dute: norentzat izango da taldekideekin batera gozatzeko sagardotegiko otordua?
Eguneko otordua, aldiz, Tilosetan izango da, 14:30etan, eta bazkariari egingo dio segida, Revuelta anaien eta Etxebesteren kantaldiak.
Bukatzeko, kalebuelta musikatua izango da, herrian zehar.