Arabako Errioxako ardoak Maialen Lujanbio izango du pregoilari, aurten.
Kuadrillako herrietan txandaka egiten den festa da Arabako Errioxako Mahats Bilketa Festa, eta aurtengoan, Bilar herrian egingo da, irailaren 16an. Arabako Errioxako kuadrillako biztanleek sortu zuten ospakizuna, bertako produktu kuttunena, ardoa, goraipatzeko, eta mende laurden beteko duen honetan izango da pregoilari, bertsolari hernaniarra.
Bertso eta ardoaren sorgin
Gonbidapenaren berri jakitean, Bilarren izan zen Maialen Lujanbio, ingurua eta biztanleak ezagutu eta festan izango dela baieztatzeko. Pozik azaldu zen, «nerekin gogoratu direlako», eta baita ere, «horrela, Arabako Errioxan euskeraren alde lan egiten dutenei babesa» emateko aukera duelako.
Gerardo Olano alkateak, era berean, azpimarratu zuen Lujanbiok «ehuneko ehunean» betetzen duela helburua; «emakumea genuen buruan, eta gainera, Maialen, euskal kulturan erreferente da». Horrela, Lujanbiok Karra Elejalde aktore gasteiztarraren testigua hartuko du, bera izan baitzen pregoilari lehengo urtean, Ekoran.
«Pozten nau Arabako Errioxan euskeraren alde lan egiten dutenei babesa erakutsi ahal izateak»
Bisita horretan, besteak beste, Sorginen Txabola edo La Hechicera deitzen zaion trikuharriaren aurrean egin zioten argazkia bertsolariari; herriko eta eskualdeko ikurra baita. Hain zuzen, trikuharriak ardoari ikutu berezia ematen dion moduan sorgindu zituen Lujanbiok inguruko biztanleak, eta ‘bertsoen sorgin’ ere izendatu zuten. Orain, bertsolaria ardoarekin ‘sorgintzea’ daukate helburu. Bisita egunarekin bukatzeko, bazkari baten bueltan bildu ziren hainbat lagun, eta Maialen Lujanbiok bertso batekin eman zizkien eskerrak, denei.
Egun osoko egitaraua
Festa eguna irailaren 16rako jarri dute, eta egun osoko egitaraua ere prest daukate.
Pregoiaren aurretik, 11:00etan, Ardoaren Dantza egingo dute Arabako Errioxako dantza taldeek. Horren ondoren, 11:30etan egingo da ekitaldi ofiziala, eta bertan ariko da pregoilari lanetan, Maialen Lujanbio. Bertan zapalduko da mahatsa, eta aurreneko muztioa dastatu ahal izango da. Arabako Errioxako ardoak dastatzeko aukera ere izango da segidan; 7 euroren truke, kristalezko kopa jaso eta bost ardo probatzeko aukera izango da.
Dastaketarako gida nahi duenak, berriz, 12:30etan izango du tartea. Ordu berean, bestalde, Aizkolarien Mahats-biltze Txapelketa egingo da, eta goiza borobiltzeko, herri bazkaria izango da 14:30etan. Arratsaldean, pelota partiduak izango dira.
Trikuharrira bisita, egun osoan zehar
Bestalde, egun osoan zehar nahi duenak ‘Sorginen Txabola’ trikuharria bisitatu ahal izango du. Era berean, umeentzako jolas eta ekintzak, musika, eta artisauen eta labeldun nekazaritza produktuen azoka izango dira.
ARABAKO ERRIOXAKO XXV. MAHATS BILKETA FESTA
Irailaren 16an
11:00, Ardoaren Dantza.
11:30, Pregoia eta ekitaldi nagusia: mahatsa zapaldu eta aurreneko muztioaren dastaketa.
12:30, Bilarreko ardoen dastaketa gidatuak.
12:30, Aizkolarien Mahats-biltze Txapelketa Handia.
14:30, Herri bazkaria.
16:30, Pelota partiduak.