Hanka bat behintzat Zubipen dute dagoeneko CD Hernaniko emakumezkoen Euskal Ligako jokalariek; bestea, agian, oraindik oporretan. Baina pixkanaka-pixkanaka lanean hasteko garaia dute, aurtengo Ligan aurrekoan bezain txukun ibili nahi badute, behintzat.
Eta lan hori egiteko, klubeko aurpegi ezagun bat izango dute gidari; Ainitze Rodriguez hernaniarra izango da aurten, taldearen entrenatzaile. Ane Ibarburu ariko da entrenatzaile laguntzaile lanetan; eta atezainek, aldiz, klubeko ohiko entrenatzaileekin landuko dituzte geldialdiak.
22 jokalari izango ditu aurten taldeak, horietako hiru, jubenil mailakoak. Izan ere, iaztik lau baja izan dituzte, eta beste bi jokalari kanpoan dira urte hasierara arte.
Berotzen hasteko, aurreneko lagunartekoak abuztuan bertan izango dituzte. Oiartzun izango dute aurreneko aurkari, datorren astean.