Santio jaiak bukatu eta astebetera bildu zen jai batzordea, festen balorazioa egiteko. Udal Gobernu Taldeak bere irakurketaren berri eman du, eta «positiboak» izan direla dio; «orokorrean, oso giro ona izan da herrian, eta elkartasunez bizi izan diren festak izan dira aurtengo Santioak».
Arazoak konpontzeko prest
Ekitaldi arrakastatsuen artean, kontzertuak nabarmendu ditu; «adin guztietako biztanleek disfrutatu dituzte».
Era berean, Kontxa Etxeberria, Astigarragako alaba kuttunari egindako omenaldia azpimarratu du, nahiz eta oposizioak ez parte hartu. «Oso harrera ona izan zuen, bere familiaren presentziarekin. Zoritxarrez, ez zen oposizioa bertan izan».
Azkenik, elkarlanaren garrantzia aipatu du. «Berriro ere argi gelditu zen Udalak Gazte Asanbladarekin duen harremanaren helburua elkarlana dela. Gazteek arazo bat izan zuten, txosnako lona apurtuta agertu baitzen. Udal gobernuari deitu, eta hau berehala bertaratu zen udaltzaingoarekin, egoera aztertzeko eta gazteak lasaitzeko».
Azkenik, datorren urtera begira ere lanean hasia dela azaldu du Udal Gobernu Taldeak, «zarata gehien sortzen duten ekintzak lekuz mugitzea» helburu.