Aurreko fasea edo prebia uztailaren 14an hasi ondoren, gaur jakingo da nork jokatuko duen 36. Buruz Buruko Kutxabank Txapelketako Ligaxka aurreko urteko hiru onenekin batera: Urriza txapelduna, Uterga eta Barrenetxea IV.
Endikak eta Ezkurra IIk jokatuko dute prebiako azkeneko lehia hori, 16:00etatik aurrera, Galarretan.
Ligaxka, larunbatetik
Txapelketaren azkeneko fasea hasiko da larunbatean, eta aitzakia horrekin, hogeita hamaseigarren edizioaren aurkezpena egin zuten asteartean Galarretan. Bertan izan ziren Xabier Azpiroz, Javier Urriza eta Endika Barrenetxea erremontistak.
Azkeneko biek zuzenean jokatuko dute Ligaxka larunbatetik aurrera; Azpirozi, aldiz, astearteko prebiako partiduan egin zion ihes txartelak.
Bertan izan ziren biekin batera, Uterga ere izango da Ligaxkan, baita gaurko partidua irabazten duena ere, Endika edo Ezkurra II.
Aurreneko partidua, larunbatekoa, Urriza eta Utergaren artekoa izango da; Barrenetxea IVk, aldiz, asteartean izango du norgehiagoka, sailkatzen denaren aurka.
Finala, irailaren 8an
Abuztuaren 28ra arte iraungo du Ligaxkak; ondoren, irailaren 1ean jokatuko dute finalerdia bigarren eta hirugarren sailkatuek. Aurreneko sailkatua, aldiz, irailaren 8ko finalean sartuko da zuzenean, eta finalerdiko irabazlearekin lehiatuko da.
Beste behin ere, Urriza da txapela irabazteko faboritoa; bosgarrena lortu zuen iaz, eta seigarrenaren bila aterako da. «Zaila izango da Urrizaren gainetik pasatzea», onartu zuen Barrenetxea IVk, baina «iaz baino indartsuago» aterako dela ohartarazi zuen.
Kutxabank, beste behin, babesle
Jokalariez gain, astearteko aurkezpenean izan ziren Xabier Gonzalez, Oriamendi 2010eko gerentea, eta Arrate Agirrezabalaga, Kutxabankeko ordezkaria eta txapelketaren babeslea, beste urte batez.
Agirrezabalagak adierazi zuen «ohorea» dela Kutxabankentzat «azkeneko fase honen babesle izatea». Ildo horretatik, txapelketaren «kalitatea eta giroa» goraipatu zituen.
Horregatik, «eskerrak» eman zizkion Gonzalezek, eta adierazi zuen, Oriamendi 2010 enpresatik ere espero dutela «partidu politak ateratzea». Horretarako, herritarrak animatu zituen Galarretara bertaratzera.
EGUTEGIA
-GAUR, prebiako azkeneko partidua: Ezkurra II-Endika.
LIGAXKA
-Abuztuaren 11 eta 28a bitartean, astearte eta larunbatetan.
-Lau pelotarik jokatuko dute: Urrizak, Utergak, Barrenetxea IVk eta prebiako aurrenekoak.
FINALERDIA
-Irailaren 1ean: Ligaxkako bigarren eta hirugarren sailkatuaren artean. Laugarrena, kanporatua izango da.
FINALA
-Irailaren 8an: Ligaxkako aurreneko sailkatua zuzenean pasako da.