Pasa den abuztuaren 2an eman zioten hasiera Donostiako Musika Hamabostaldiko ekintzei; beroari aurre egiteko, musikaz bustitzen ari dira Gipuzkoa, handik eta hemendik etorritako artistek. Haritz Ezeiza, Paulo Agirre eta Juanjo Iturrioz hernaniarrek hartu zuten parte Inaugurazio Eguneko ekintzetan, eta bihar, Hernanin egingo du geldialdia musika jardunaldiak.
Organo Zikloa, Hernanin
Ohi bezala, zikloetan antolatu ohi dute jaialdia, eta, hain justu, Organo Zikloari dagokion kontzertuetako bat izango da biharkoa. Bertan eskainiko dute kontzertua Loreto Fernandez Imaz organo-joleak eta Ainhoa Zubillaga mezzosopranoak. San Joan Bataiatzailean izango da, arratsaldeko 20:00etan hasita. Sarrera debalde izango da.
Zailtasun tekniko haundiko programa
Musika munduan sona haundia duten musikariak dira Fernandez Imaz eta Zubillaga. Antolatzaileek azaldu dutenaren arabera, «zailtasun tekniko nahiz maila artistiko haundiko» programa osatu dute biharko.
Besteak beste, Fauré, Franck, Duruflé eta Mahler-en obrekin gozatu ahal izango dituzte bertaratzen diren entzuleek, organo-jolearen eta mezzosopranoaren eskutik.
Hilabete osoa, musikaz blai
Hernanin geldialdia eginda, irailaren 1era arte izango du segida Hamabostaldiak.