Abisua jaso ondoren, Udaltzaingoa eta Udaleko Babes Zibila gerturatu ziren ostiralean Sandiusterrira, eta kendu egin zuten liztor asiatikoaren kabia bat. Sandiusterriko eraikinean, Larramendi kalera ematen duen aldean zegoen kabia, galdara gelaren aireztapenerako lehiotxoan.
Azken urteetan ohikoa bihurtu da liztor asiatikoen kabiak ikustea udara parte honetan, eta agian horregatik, ohitu egin dira herritar asko. Baina Udaleko Babes Zibilak lanean segitzen du kabia horiek kentzeko, eta eskatu die herritarrei «mesedez, bat ikusiz gero, ez saiatu kentzen».
Alferrikako lana
«Liztor asiatikoaren ziztada arriskutsua» dela gogorarazi du Babes Zibilak; «ez da ohikoa, baina izan dira ziztadak».
Hala ere, kezka nagusia kabiak ondo ez kentzeak sortzen du. «Ez badira ondo kentzen, ez da ezer aurreratzen. Bizirik geratzen diren liztorrek berehala egiten dute beste kabia bat».
Horregatik azpimarratu dute bat ikustean ez saiatzeko kentzen, eta horren ordez, «Udaltzaingora deitzeko. Zerbitzua 24 orduz ematen dute». 943 24 89 00 da 24 orduko arretarako telefono zenbakia.
Sandiusterrikoa, «inaktibatua»
Ostiraleko goizeko 11:00k aldera kendutako liztor kabiari dagokionez, «inaktibatuta» dagoela ziurtatu dute. «Galdara gelako aireztapenerako lehiotxoan zegoen, porlanezko markoaren zulo batean. Larba eta guzti. Ez genuen ikusten, baina abisuari esker kendu dugu».
Behin kabia kenduta, egun batzuetara berriro pasatzen dira teknikariak bertatik, ezer geratu ez dela ziurtatzeko.