Seigarren estropadan, seigarren egin zuen Hernanik larunbatean, ia seigarren aldiz; zazpigarren egin du behin. Badirudi horixe dela ETE Liga honetan Maialen ontziari egokitu zaion postua. Hala ere, Hernaniko neskak etengabeko hobekuntzan ari dira, postua mantentzen badute ere.
Pasaiako estropadan Donostiarra izan zen aurrenekoa, 12:09,78ko denborarekin, eta etxera eraman zuten Ikurriña. Atzetik sartu ziren Deusto, Hibaika, Tolosaldea eta Kaiku, 13, 14, 22 eta 28 segundotako aldeekin, hurrenez hurren. Hernanik 12:39,80ko denbora behar izan zuen, eta atzetik geratu ziren Lea Artibai, Lapurdi eta Colindres.
Sailkapen orokorrean ere hurrenkera horretan mantendu dira ontzi guztiak, 50, 47, 43, 37, 33, 23, 19, 12 eta 6 punturekin. Ekuadorea pasata, asteburu honetan beste bi estropada izango dituzte neskek; Hondarribian eta Ondarroan.