Ekuadorrera iritsi da Maialen trainerua, ETE Ligari dagokionez, behinik behin. Bihar, Ligako 12 estropadetan seigarrena jokatuko du, Pasaiako uretan. Banakako erlojupeko proba izango da, eta arratsaldeko 17:30etan hasiko da, Pasai Donibane Koxtape Arraun Elkartearen egoitza paretik abiatuta.
Bederatzi ontzi, uretan
Banakako erlojupeko proba honetan bederatzi ontzik hartuko dute parte, eta Hernaniko arraunlariena proba egiten laugarrena izango da. Aurretik, Colindres, Lapurdi eta Lea-Artibaik egingo dute arraun, eta ondoren, Kaiku, Tolosaldea, Hibaika, Deusto eta Donostiarrak.
ETE Ligako seigarren estropadaz gain, VII. Pasaiako Ikurriña ere izango da jokoan.
Play offen aurretik jokatu beharreko seigarren estropada izango da biharkoa, eta beraz, ligaren erdia egina izango dute Hernaniko neskek. Hurrengo jardunaldiak izango dira: abuztuaren 11n Hondarribian, 12an Ondarroan, 15ean Plentzian, 18an Donostian, 19an Deustun eta 25ean Colindresen. Play offak, berriz, irailaren 15 eta 16an jokatuko dira, Bermeon eta Portugaleten, hurrenez hurren.
Euskadiko Txapelketa ez zuen jokatu ‘Maialen’ ontziak, bete behar ziren baldintzak eta azken erabakiak medio.
Tartean, Kontxa
ETE Liga ez da, ordea, Hernanik aurrez aurre daukan erronka bakarra. Urtero bezala, Kontxako Bandera jokatuko da iraileko aurreneko bi igandetan, eta aurretik, sailkatze estropada izango da jokoan, abuztuaren 30ean.
Asteartean estropadarik ez, Lekeition
Lan gehiago ere badaukate Hernaniko arraunlariek. Pasa den igandeko estropadan irabazi zuten jubenilek, esaterako, Loiolako San Inazio jaietan jokatutako batel estropadako bandera.
Era berean, asteartean Lekeition egin zen Euskadiko Txapelketa jokatzekoa zen Maialen trainerua. Baina azkenean, ez zuen parte hartu. Azaldu dute txapelketa honetako araudia desberdina dela, eta beraz, ezin izan zutela parte hartu. Izan ere, batetik, aurreneko urteko jubenilek ezin zuten parte hartu, eta bestetik, lan kontuak medio, arraunlariek ezin izan zuten ontzia osatu.
Beraz, Loiolako bateletako bandera irabazi izanak emandako kemena, eta orain arte ETE Ligan egindako pixkanakako goranzko lana izan beharko dituzte oinarri neskek, biharko estropadan kontzentratu eta aurrera egiteko.