HaidaRock Banda Lehiaketa irabazi zuen Meltdown taldeak 2015ean, eta orduan hasitako goranzko bideak toperik ez duela ematen du. Egun hauetan, Europan barrena dabiltza.
Hamahiru egun, hamahiru kontzertu
Astelehenean ekin zion birari taldeak. Dagoeneko Madril (Espainia), Lyon (Frantzia), Fontaine-L’Eveque (Belgika) eta Karlsruhe (Alemania) bisitatu dituzte.
Gaur, berriz, Txekiar Errepublikan sartuko dira: Plzen izango da abiapuntua. Bihar, Novy Jicin, eta etzi Praga izango dituzte helmuga. Zazpi egunen ondoren, zortzigarrenean atsedenerako tartea hartzeko asmoa zuten, baina badirudi hilaren 6an ere joko dutela, Bielsko-Bialan (Polonia). Hurrengo egunean, hilaren 7an ere Polonian joko dute, Wroclaw-en. Hilaren 8 eta 9a dauzkate konfirmatzeko, eta 10ean Suitzan izango dira, Zug-en, eta 11n, Frantzian, Volmerange les Mines-en. Facebook orrialdean egin daiteke taldearen jarraipena.
Diman, azkena
Europako bira bukatuta, ordea, segi egingo dute. Oraingoz, zehaztuta dauzkate Espainian beste bi emanaldi: hilaren 25ean Ciudad Realen eta irailaren 1ean Pobra do Caramiñalen. Eta Portugalen beste bi kontzertu ere emango dituzte: irailaren 2an Porton eta 15ean Faron.
Oraingoz, azkena, etxetik gertuago emango dute: irailaren 29an Dimako Dimetal Festen ariko da Meltdown taldea.