Gutxik ezagutuko dute Antton Garinek bezain ondo, San Inazio egunean Santa Barbaran ospatzen den jaia. Gaur beteko dira 40 urte, aurrenekoz aritu zela han bertsotan, eta ordutik urtero kantatu du. «Koadrila bat igotzen ginen, denak herrikoak, eguerdiko erakustaldira: Joxe Mari Ormazabal Tturko, Joxe Mari Mujika Anatx, Argiñarena, Aristorena, Julian Ezeiza Aterpe eta ni, bertsotan; Pakito eta Kinito harri jasotzen; eta Larrabide, Pikabea eta Zugasti aizkoran», gogoan du Garinek. Talde hori, Hernanin galdu xamar zegoen bertsolaritza berpizteko osatu zuten, eta txikiteoetan eta auzoko festetan aritzen ziren. Bertsolaritzaren berpizte horretan, nabarmendu du Juanjo Uriaren laguntza haundia.
«Gu Santa Barbarara igotzen hasi baino lehen, Enbeitatarrak etortzen ziren Bizkaiatik urtero, bertsotan aritzera. Baina etortzeari utzi, eta guri deitu zigun Anjel Osa antolatzaileak. Ordutik, urtero-urtero».
Juxtu aurten da 40 urte
Santa Barbara iyua,
kuadrila ederra San Inaziotan
kantua eta bertsua.
Mendi horrek e oraindikan e
badauka ze kontatua,
urtiak zahartu gerade eta
laister gea retiratuak.
Mila esker denoi bihotz-bihotzez,
zuengatik ez nago ahaztua,
egiya esan banijua ta
begiyan iya malkua.Antton Garin
Baina bertsotara joan baino askoz ere lehenago, txiki-txikitatik igotzen zen Antton Garin Santa Barbarara, «korrika batean», eta San Inazio egunean ez du sekula huts egin: «lehen, ohitura zen bazkariarekin igo, eta zuhaitzen baten azpian familian bazkaltzea. Egun osorako geratzen ginen bertan. Egun seinalatua zen San Inazio Hernanin; denak Santa Barbarara igo, eta hutsa geratzen zen herria. Orain asko galdu du; jendeak lehen Hernanin egiten zituen oporrak, eta orain kanpora joaten dira».
«Apaizari ziria sartzen aritzen ginen bertsotan»
Hainbeste urtetan, anekdotak ere gordeta dauzka Garinek. Gogoan du, apaizari, bere sermoiean, ziria sartzen aritzen zitzaizkiola, bertsotan; «baina ez zen haserretzen». Eta gogoan du, baita ere, urte batean sekulako euri jasa eta trumoiak hasi, eta korrika batean jaitsi zirela denak: «Peña Otañon egin genuen bazkaria, eta arratsaldean atertuta, soziedade aurrean, herri kirol erakustaldia».