Buruntzaldea Torneoko finalak larunbatean jokatu ziren Hernaniko frontoian eta denetarik egon zen. Hasteko kadete mailan Astigarragako Lizeaga anaiek partidu lehiatua eta estua irabazi zieten Oiartzabal hernaniarrari eta Albeniz II aiarrari. Ez zen egunik hoberena izan Hernaniko pelotarientzat, bai ordea Astigarragako Lizeaga anaientzat. Oiartzabal eta Albeniz kadeteek ongi jokatu zuten eta ezustekoa ematekotan egon zire. Torneo bikaina osatu dute bai txapeldun eta azpitxapeldunek.
Jubeniletan, Ekaitz Insausti eta Garikoitz Arizmendik partidu zaila zuten, Oteiza eta Salegi zestoarren aurka. Eta partiduan zehar erakutsi zuten zestoarrek bikote sendoagoa osatzen zutela. 18-11 irabazi zuten. Pronostikoa goitik behera bete zuten.
Nagusietan, Xabat Pagola hernaniarrak eta Iñigo Ugalde oiartzuarrak ez zuten pasa den urteko garaipena errepikatu. Aurrean oso bikote sendoa aurkitu zuten. Etxezarreta eta Usandizaga andoaindar gazteek erakustaldia eman zuten eta 18-9 irabazi zuten Buruntzaldeako Torneoa. Gazteak izan arren maila altua erakutsi zuten eta bikote hernaniar-oiartzuarra berriz, ez zen bere mailarik hoberenean aritu.
Finalak amaituta, guraso batzordeak denboraldi amaierako festa potoloa antolatu zuen. Pelotari guztiak, zale eta familiako kideek pintxo-potea dastatu zuten.