Oronak, IK4-Ikerlanek eta Mondragon Unibertsitateak egindako garapen batek Elevcon-en hitzaldi teknikorik onenaren saria irabazi du. Garatutako proiektuak huts elektrikoei eta mekanikoei aurrea hartzeko aukera ematen du, biki digital bat (Digital Twin) eta ereduetan oinarritutako monitorizazio-teknikak erabiliz, eta batzarreko Hi-Tech saria jaso du
Garraio bertikalaren sektoreko erreferentziazko nazioarteko batzarra da Elevcon, eta hogeita bigarren aldiz egin da, orain gutxi. «Biziki txalotu du batzarrak han aurkeztutako monitorizazio-proiektuaren berrikuntza-maila haundia» diote Orona, MU eta IK4-Ikerlanetik.
Berlinen egin zen garraio bertikalaren sektorearen nazioarteko batzar ospetsu hori, 22garren edizioa, maiatzaren 22tik 24ra.
«Biziki txalotu du batzarrak han aurkeztutako monitorizazio-proiektuaren berrikuntza-maila haundia»
Jasogailu Ingeniarien Nazioarteko Elkarteak antolatzen du topaketa, eta, Oronaren, IK4-Ikerlanen eta MUren proposamenaren berrikuntza-mailari altua iritzita, hura aukeratu du beste hogeita hamar parte-hartzaile baino gehiagoren artetik.
Hala, garraio bertikalaren sektoreko teknologiarik puntakoenak aintzatesten dituen Hi-Tech saria irabazi dute hiru erakundeek.
Igogailu adimendunagoak
Igogailu baten funtzionamenduaren egoera monitorizatzeko aukera ematen duten sentsore birtualetan oinarritzen da Elevconeko epaimahaiak saritutako garapena, zeinaren xedea sentsore horien bidez huts elektriko eta mekaniko posibleei aurrea hartzea baita.