Irakurtzeko euskarazko aldizkaria da Latxe, jolas, ekintza eta denbora pasa parte hartzaileekin uztartzen dena. Urumea bailarako ondarea, ohiturak, ezaugarriak eta ahozkotasuna lantzen ditu bere orrialdeetan.
Eta azkenik, aniztasun sozialean eta balioetan hezteko ezaugarriak ditu bere baitan.
0 alea kalean da dagoeneko, eta hilabetean behin eskuratu ahal izango da
Uztailean argitaratu da Latxeren 0 alea, eta Astigarraga, Hernani, Ereñotzu, Arano eta Goizuetako umeen artean zabaldu da. Guztira, 700 ale inguru banatu dira. Udaleku irekiak, aukera bikaina izan dira, ume guztiak bildu eta aleak banatzeko. Sorpresa txiki bat ere izan dute haur hauek. Izan ere, Latxeko protagonista bera, Burruntzi, joan zaie bisitan; eta aldizkariak ez ezik, makina bat muxu eta bosteko ere banatu ditu denen artean.
Kronikalari txiki egin zaitezke
Hilabetero-hilabetero Burruntziren abenturak segi ahal izateko, Kronikalari txiki egin beharko dute irakurle txiki hauek, eta urtean 24 euroren truke, beraiek eskatutako Kronikako ohiko puntuan jaso ahal izango dute bere hilabetekaria.
Horretarako, Hernaniko Larramendi kalea 11ko bulegotik pasa, 943 33 08 99ra deitu edo latxe@kronika.eus helbidera idaztea nahikoa izango da.