Herrian txakurra aske eramaten dutenei, isunak jartzen hasi da Astigarragako Udaltzaingoa. Hala jakinarazi du Udalak: «epe batean abixuak ematen aritu ondoren, eta ikusita gatazkak izaten eta kexak jasotzen jarraitzen dugula, diru isunak jarriko zaizkie, animaliak edukitzeari buruzko ordenantza betetzen ez dutenei». Eta gogorarazi du, ordenantzak dioela, ezin direla txakurrak aske utzi, horretarako propio prestatutako guneetan ez bada: Ergobia eta Arrobitxuloko txakur parkeetan, Mundarro plazan, Pagoagako bidean, eta Murgia parkean (udaran 21:00-09:00 eta neguan 19:00-10:00 bitartean).
Udalak azaldu du, konponbidea eman nahi diela, txakurrak aske eramateagatik sortu diren elkarbizitza arazoei: «liskar kezkagarriak izan dira, txakurren jabeen eta animaliarik ez duten bizilagunen artean, bereziki Kontxa Etxeberria plazan, non espreski debekatuta dagoen txakurrak jardinetara igotzea».
Horregatik, arauak errespetatzeko deia egin die herritarrei: «ordenantza betetzeak, herria garbiago eta liskarrik gabe mantentzen lagunduko digu», nabarmendu du.