SANTIO festak gaur hasiko dira Aranon eta Urumea bailarako biztanleek aukera ederra dute Astigarraga edo Aranoko jaiez gozatzeko. Aranon gaur hasi eta ostiralean, larunbatean eta igandean luzatuko dira jaiak. Lehendabiziko eguna, Santio eguna, txupinazoarekin hasiko dute.
Hiru zita nagusi izanen ditu estreinako egunak, txupinazoaren ondoren. Urteroko pilota partidua jokatuko dute aurrena, Arano eta Goizuetaren artekoa: ziztangilak, sapuen kontra. Huizi eta Lizeaga ariko dira aranoarren aldetik, eta Salaberria eta Apezetxea goizuetarren bandoan. Eguerdian izanen da hori, eta arratsaldean, dantzariek eta bertsolariek piztuko dute herria.
Dantzarien txanda, 18:30etan izanen da, eta ondoren bertso saio dotorea prestatu edo antolatu dute. Lau bertsolari eta ez nolanahikoak ariko dira bertsotan, 19:30etatik aurrera. Azken Euskal Herriko Txapelketako bi finalistak bertan izanen dira; Maialen Lujanbio, txapeldun hernaniarra eta Aitor Mendiluze, azpitxapeldun andoaindarra. Beraiekin batera Julio Soto txapeldun nafar gorritiarra ere egonen da eta Amasa-Villabonako Oihana Iguaran ere bai.
Bihar atsedena eta ostiralean jarraituko du festak
Ostiralean, Haurren eguna ospatuko da. Pilotarekin ekingo diote eta txokolatadaren ondoren, izanen dute aurtengo nobedadea: azienden partez, zirku tailerra eginen dute, Xomorro Taldearen eskutik.
Larunbatean Herri Gurasoen eguna da. Urteroko arkume jatea eginen da egun honetan. Kontsejuan, Goizuetako Amaian edota Hernaniko Deportivo tabernan daude txartelak salgai, 30 euroan eta haurrek 6 euroan.
Igandean jarriko diote festei amaiera Zintangilon egunarekin. Egun haundia izaten da. Feria jarriko dute frontoian, goizetik, herriko produktuekin; eta tortilla lehiaketa ere izanen da, eguerdi partean. Gero, postuak kendu, eta aizkolarientzako prestatuko dute, arratsaldean. Desafio polita, beste behin: Xabier Orbegozo Arria V eta Joseba Izeta aranoarra, Esnal aita-semeen kontra.
Herri afaria eta Tapiaren musikarekin jarriko zaio amaiera ezin hobea.
GAUR UZTAILAK 25, Santio eguna
12:00, Txupinazoa.
12:30, Pilota partidua: Goizueta-Arano. Aranoren aldetik, Huizi eta Lizeaga; eta Goizuetaren aldetik, Salaberria eta Apezetxea.
18:30, Dantzariak.
19:30, Bertsolariak: Julio Soto, Oihana Iguaran, Maialen Lujanbio eta Aitor Mendiluze.*Mezak: Uztailaren 25ean eta 28an, goizeko 11:00etan.
Maitane-Nagore eta Ruiz-Manterola, txapeldun
Pasa den igandean jaien preludio gixa Santiotako Pala Txapelketako finalak jokatu ziren. nesketan Maitane eta Nagore aranoarrak gailendu ziren, finalean, 22-11, Idoia eta Iratxeri irabazi eta gero.
Hirugarren eta laugarren postuaren borrokan Ekhiñe eta Garazik (igandean Maitanek jokatu zuen) 22-21 irabazi zieten Eider eta Emeren aurka (igandean Eiderren ordez Edurnek jokatu zuen).
Mutiletan ez zen 3garren eta 4garren postuaren partidarik egon eta zuzenean finala jokatu zen. Bertan, Mañel Ruiz eta Manterolak jantzi zituzten txapelak, Gelbentzu eta Olasagastiri 22-7 irabazi eta gero. Giro ederra egon zen Aranoko frontoian eta jendeak gozatu zuen.