Ez du hutsik egin, beste behin, Aranoko Pala Txapelketak ere, Santio jaien atarian. Baina aurtengoan, txapelketa azkarra izan da, eta joan den asteburuan jokatu zituzten partidu guztiak... Azkeneko biak izan ezik: bi final haundiak. Bihar goizean bertan izango dira horiek, 11:00etan hasita: nesketan, Tejedor ahizpak, eta Maitane eta Nagore aranoarrak ariko dira aurrez aurre, txapelaren bila; eta mutiletan, Ruizek eta Manterolak jokatuko dute, Gelbentzu eta Olasagastiren kontra. Lau bikote sendo, baina birentzat bakarrik daude txapelak!
Joan den larunbatean jokatu zituzten ligaxka eta semifinalak, neskek. Guztira sei bikote aritu ziren lehian: goizean sailkatze faseko bina partidu, eta bazkaria ere giro ederrean egin ondoren, arratsaldean semifinalak: 22-13 irabazi zieten Maitanek eta Nagorek, Eider eta Emereni; eta 22-21 Idoia eta Iratxe Tejedorrek, Ekhiñe eta Garaziri.
Mutilek, berriz, igandean zeukaten zita. 11 bikote aritu ziren, hiru fasetan: ligaxka aurrena, final laurdenak gero, eta semifinalak azkenik. Nesketan bezala, estua izan zen semifinaletako bat, Gelbentzuk eta Olasagastik irabazi zietena, Lujanbio eta Murgiondori, tanto bakarreko aldearekin (16-15). Baina erosoago lortu zuten finalerako pasea, Ruizek eta Manterolak, Kerejeta eta Legarretari irabazita (16-6).