Datorren asteartean hasiko dira Santio jaiak, Astigarragan, lehendabizi Xaguxarren txupinazoarekin eguerdiko 12:00etan; eta ondoren nagusia 19:00etan, Euskaraldian parte hartuko duen Astigarragako Hamaikakoak botako duena. Hortik, uztailaren 28ra luzatuko dira festak.
Baina hori baino lehen, berotzeko zenbait ekintza izango dira asteburu honetan. Kirola izango da protagonista nagusia saskibaloia, korrika eta herri krosarekin.
Bi zita daude gaur. Goizeko 10:00etan hasita, 3x3 saskibaloi txapelketa antolatu du Mundarrok, kiroldegian. Iker Ruizen Oroimenezko 18garren edizioa izango da aurtengoa. Aldez aurretik apuntatu ez diren taldeak ez dira onartuko. Goizean zehar lehen partidak jokatuko dira eta eguerdiko atsedena eta gero, arratsaldean finalerdiak eta finalak ospatuko dira.
Eta arratsaldean ere, Astigarragako Herri Krosaren 16garren edizioa izango da, 17:30etan hasita. 7,3 kilometro izango ditu, eta 16 urtetik gorakoek hartu dezakete parte. Oraindik ere izena eman ez baduzu lasai; gaur bertan ere izango da aukera, Apeztegi plazan, 9 euroan. Hurbildu eta eman izena!
Bihar pelota partiduak jokatuko dira 10:30etan hasita. Asier Olaizola, Otxandorena eta Pascual ariko dira, besteak beste
Eta bihar, azkenik, maila haundiko esku pelota jaialdia izango da, herriko pelotariekin eta profesional ohiekin: Olaizola I-Gurutzealde, Exposito-Otxandorenaren kontra ariko dira alde batetik; eta Olazabal-Santxez, Barandiaran-Pascualen kontra ondoren. 10:30etan hasiko da jaialdia Txomiñenen, doan. Hasteko Mundarroko gazteak jokatuko dute partidua eta ondoren etorriko dira bi partidu nagusiak.
Gaurko eta biharko jardunak ez dira izango lehendabizikoak, atzo izan zen aurrenekoa. Igel jokoa, Xaguxarrek eta Galtzaur elkarteak antolatu zuten goizean zehar, Norberto Almandoz plazan, eta haur eta gaztetxo banak osatutako bikoteak aritu ziren jokoan. Giroa ezin hobea sortu zen gazteen artean, baita bote jokoan ere.