Ederki ari dira azkenaldian, probintziako txapelketa ezberdinetan, Txantxangorri elkarteko kideak. Eta nabarmentzekoa izan da, aurreko asteburuan Patxi Barreirok lortutako garaipena.
Txantxangorriko lehendakari izan zenak, txapela ekarri zuen Billabona-Amasatik, joan den igandean. Bertan, Gipuzkoako Usakume Tiraketa Txapelketa jokatu zen, colombaire erara. 217 partehartzaile aritu ziren lehian, eta denetan onena izan zen Barreiro. Horrela, Gipuzkoako txapeldun berria da.
Jon Ander Zapiain bigarren, Euskadiko Kopan
Horrekin batera, ekaineko beste emaitza baten berri ere eman nahi izan du elkarteak, orain. Ekainaren 10ean, zehazki, Usakume Tiraketa izan zen Hondarribian, colombaire erara hori ere. Euskadiko Kopako proba izan zen, eta bertan aritu zen Txantxangorri elkarteko beste kide bat: Jon Ander Zapiain, 15 urteko bazkide gaztea.
Baita emaitza harrigarria lortu ere! 183 partehartzaileren artean, bigarren sailkatu zen Zapiain.