Egun gutxi batzuk besterik ez dira falta, Aranoko Santio jaiak hasteko. Santio egunean hasiko dira, uztailaren 25ean, datorren asteazkenean. Baina ordurako, izenemateak eta txartel erosketak eginda beharko dituzte, jaietako zenbait ekintzatan parte hartu nahi duten guztiek.
Batetik, dagoeneko salgai daude, uztailaren 28an eginen duten arkume jaterako txartelak. Aranon, Kontsejun erosi daitezke; Goizuetan, Amaia kafetegian; Hernanin, Deportivo tabernan; eta Urnietan, Kantoi tabernan. Helduen txartelak, 30 euroan daude salgai; eta haurrenak, 6 euroan. Eguerdiko 14:30etan eginen dute arkume jatea, goiz osoan zehar erretzen eduki ondoren.
Feria eta tortilla lehiaketa, jaien azkeneko egunean
Eta uztailaren 29an, feria jarriko dute Aranon, herritarren jakien edo asrtisau produktuen postuekin. Postua jartzera animatu dituzte aranoarrak, eta horretarako, eskatu dute aurrez abixatzeko, festen batzordeko norbaiti, posturako tokia gordetzeko.
Feriarekin batera, ez da faltako tortilla lehiaketa ere, eta parte hartzeko deia luzatu diete, herritarrei. Eguerdiko 12:00etatik 13:00etara entregatu beharko dituzte tortillak, feria gunean bertan.
Santio egunez, esku pelota, dantzariak eta bertsolariak
Festak berotzen hasteko, Aranoko Pala Txapelketaren finalak jokatuko dira igande honetan, nesketan zein mutiletan, goizeko 11:00etan hasita.
Eta asteartean botako dute txupinazoa, udaletxeko balkoitik, eguerdiko 12:00etan. Hiru zita izanen ditu, jaien estreinako egunak. Txupinazoaren ondoren, 12:30etan, esku pilota izanen da, Arano eta Goizuetaren arteko lehiarekin: Huizi eta Lizeaga (Arano), Salaberria eta Apezetxearen (Goizueta) kontra. Arratsaldean, dantza emanaldia izanen da 18:30etan; eta maila haundiko bertso saioa gero, 19:30etan: Julio Soto, Oihana Iguaran, Maialen Lujanbio eta Aitor Mendiluze.