Koxka bat gora egin zuen Hernaniko Maialen traineruak, bere mailan, aurreko asteburuan. Eta beste aurrerapauso bat eman nahi du, asteburu honetan, onenen arteko lehian sartzeko. ETE ligako beste bi estropada izango ditu horretarako, Orion eta San Pedron; ligako hirugarrena eta laugarrena, hain justu.
Orioko Kanpina bandera izango dute jokoan, larunbatean, goizeko 11:30etan hasita. Bigarren txandan ariko da Hernani, Kaiku eta Lea Artibairekin, eta biei aurrea hartzen saiatuko da. Joan den igandean, Camargon, bi segundu aurretik izan zuen Kaiku, eta nabarmen atzetik Lea Artibai.
Igandean, berriz, Pasai San Pedron izango dute estropada, eguerdiko 13:00etan hasita.