Ave Maria parkea hartuko du beste urte batez, Udaparkean egitasmoak. Bihar hasi eta larunbatera bitarte, zortzi ekintza izango dira guztira.
Eta ekintza berezi batekin hasiko dute aurtengoa, bihar arratsaldeko 18:30etan. Ttapa Ttapa ibilaldi musikatua egingo dute, Atsegindegitik abiatu eta Ave Maria parkean bukatuta. Izan ere, Broken Brothers Brass Band taldea izango dute lagun, paseoan. Herritar guztiak gonbidatu dituzte.
Ave Marian bukatuko dute ibilaldia, eta parkean bertan izango da, eguneko bigarren zita: Babo Royal kale antzerki saioa, Ganso&Cia konpainiaren eskutik. 20:00etan hasiko da, eta adin guztietako ikusleei zuzenduta dago. Euria eginez gero, Atsegindegira mugituko dute saioa.
Eta aurreneko eguna bukatzeko, kontzertua izango da, Koban taldearen eskutik, bereziki gazteei zuzenduta.
Ostiralean, beste hiru saio
Hurrengo egunean izango du segida, Udaparkean egitasmoak, beste hiru zitarekin. Transhumancia kale antzerki ibiltaria eskainiko du aurrena, Xip-Xap konpainiak, 19:00etan; Topa dantza emanaldia gero, 20:00etan hasita, Kukai eta Brodas Bros taldeek; eta azkenik, 22:00etan, Paddington 2 pelikula jarriko dute.
Larunbatean, berriz, bi saio izango dira, bukaera emateko. Iluntzeko 20:00etan hasita, Emportats zirko emanaldia eskainiko du La Trócola Circ konpainiak. Eta 22:00etatik aurrera, Imanol Jazz kontzertua, Ainara Ortega, Iñaki Salvador, Karlos Gimenez eta Pettiren eskutik.