Kalean da Astigarraga 2018 aldizkaria, eta aurtengoan, historia, gizartea, kultura eta herriari buruzko «hainbat gai baliotsu» bildu dituzte. Horien artean, herri baratzeak dira gai nagusia: «40 herritarrek erabiltzen dituzten baratze komunitarioak dira gai nagusia, Mendiola baserriaren ondoko lursailean kokatutakoak. Baratzea lantzea helburu hartuta, bertan bildu dira hainbat lagun, barazkien inguruan ikasiz eta horiek ekoitziz eta bilduz; hori guztia komunitate giroan eta elkarri lagunduz», nabarmendu dute.
Gai historiko eta biografikoen artean, berriz, honakoak nabarmendu dituzte: Lazunenea eta bertako karobiak; Astigarragako dantza taldeak; Julian Arzamendi, luzaroan herriko mediku izandakoaren bizitza; eta Amaia Imaz Almandoz lekaime eta andereñoaren bizipenak.
Natura eta ingurumenarekin lotutako gaiek ere badute tokia aldizkarian; horien artean, landa eremuaren jabetzari eta okupazioari buruzko artikulua, eta Astigarraga habitat gisa duten suge eta sugegorrien ingurukoa.
Eta azkenik, gai sozialak, kulturari buruzkoak eta elkarteen ingurukoak izango ditu aldizkariak: Astiarrako Feministak talde sortu berria, Bertsolarien ahoz liburua, Gazte Asanblada, Herri Eskola eta Guraso Elkartea, Xabina eta Ixabel herritarren bizitza...
Aldizkaria eskuragarri, herriko ohiko saltokietan
Goraipatu nahi izan dute, «laguntzaileen ekarpen eskuzabal eta oparoari esker, balio haundiko artikuluak» bildu dituela aldizkariak: «urteroko jardun arduratsuari esker, herritarrei interes haundiko ekarpenak egitea lortzen dute lankide fin horiek». Astigar elkartearen babesa ere nabarmendu dute.
Dagoeneko eskuragarri dago aldizkaria, 3 euroko ekarpen sinbolikoaren edo bakoitzak egin dezakeenaren truke, herriko ohiko saltokietan: Valella eta Rosa okindegietan, eta Ainhoa janaridendan.