Udararekin batera arraunak giroa berotzen du Euskal Herriko kirol zaleen artean. Eta Hernaniko neskak ere buru belarri sartuta daude denboraldian. Asteazkenean, Gipuzkoako Txapelketa jokatu zuten eta atsedenerako egun gutxi batzuk izan eta gero gaur, 17:00etan, ETE Ligako bigarren jardunaldia dute Camargoko uretan. Camargo Santanderretik oso gertu dagoen herri ederra da eta eremua nahiko lasaia izaten da haizerik ez badago behintzat.
Bi txanda egongo dira eta hernaniarrak lehenengoan egingo dute arraunean. Maialen traineruarekin batera ariko dira: Colindres, Lapurdi, Lea Artibai eta Kaiku. Lehendabiziko txanda bi zatitan banatuko da. Aurretik irtengo dira Colindres eta Lapurdi eta ondoren, minutu batera; Hernani, Lea Artibai eta Kaiku.
Behin txanda hau amaituta irtengo dira bigarren txandan Deusto, Hibaika, Donostiarra eta Tolosaldea.
Hernaniren helburua gero eta estropada hobeagoak egitea da. Bere txandan Kaiku doa eta sestaotarrek asko hobetu dute eta banderaren borrokan ibili daitezke nahiz eta lehendabiziko jardunaldian bosgarren amaitu. Hernanik seigarren bukatu zuen, pasa den astean, Donostian, eta postu hori hobetzea zaila izan arren saiatuko dira.
Donostiarra zortzigarren etxean hernaniarrekin
Hernaniarrak ere badira beste traineruetan. Mutilen Donostiarran txalupan baziren bi hernaniar eta atzo 8garren amaitu zuten etxeko estropadan TKE Ligan.