Arte diziplina ezberdinak uztartuz eta adin guztietarako, eskaintza anitza eta zabala prestatu du Udalak, Ave Maria parkean, datorren asterako.
Udaparkean egitasmoaren hirugarren edizioa aurkeztu zuten atzo, datorren ostegunetik larunbatera, Ave Maria parkea gozamenerako toki bilakatu nahi duena, «adin guztietako jendearentzako», azpimarratu zuen Luis Intxauspe alkateak. «Finkatutako ekitaldia» dela nabarmendu zuen alkateak. Eskerrak eman nahi izan zizkien, programa aurrera ateratzea posible egin duten guztiei, eta «bide interesgarria» zabalik dagoela gogoratu zuen.
Diziplina eta adin desberdinak uztartzen dituen ekitaldia
Adin guztietarako antolatu dira ekintzak, eta ostegunean hasiko dira, arratsaldeko 18:30etan, Ttapa Ttapa ibilaldiarekin. Adinekoei zuzenduta dago, eta Atsegindegitik abiatu eta Ave Maria parkean amaituko dute paseoa. Hala ere, aurten bada berrikuntza nabarmen bat ibilaldian. Euskarabenturako gazteekin batera egingo dute ibilbidea, eta beraiekin batera, Broken Brothers Brass Band taldekoak joango dira, paseo musikala eginez.
Ostegunean bertan, behin ibilaldia amaituta, kale antzerkia eskainiko da 20:00etan. Denontzat Ganso&Babo Royal Bizkaiko Clown taldea da ,eta hitzik gabeko ikuskizuna eskainiko du Ave Marian. Musika ere gehitzen dio ikuskizunari.
Eta eguna amaitzeko, ondoren, 22:00etan, Koban taldearen kontzertua izango da. Donostian sortu zen taldea, eta zazpi musikari gaztez osatua dago; bost neska eta bi mutil. Estilo desberdinak nahasten dituzte, donostiarrek.
Dantza, zinea eta kale antzerki parte hartzailea, ostiralean
Ostiralean, Xip-Xap Transhumancia kale antzerki ibiltaria hasiko da 19:00etan. Parte hartzailea da eta familia guztiarentzat dago moldatua. Lleidatik datoz, eta parkean zehar ibilbidea egingo dute txontxongilozko animaliekin.
20:00etan, berriz, Kukai & Brodas Bros Topa dantza ikuskizuna antolatu da. Parkera egokitua dago. Eta azkenik, 22:00etan, Paddington 2 pelikula jarriko dute.
Eta azkeneko egunean, larunbatean, beste bi saio egongo dira. La Trócola Circ, Emportats zirkoa 20:00etan hasiko da. Oso koordinatua da eta zehatza. Eta amaitzeko, gaueko 22:00etan hasita, Imanol Jazz taldearen kontzertuan, Imanolen errepertorioa eskainiko dute Ainara Ortega hernaniarrak, eta Iñaki Salvador, Karlos Gimenez eta Petti musikariek.
Udaleko sail ezberdinen arteko elkarlana
Malores Etxeberria euskera teknikariak, bere aldetik, azaldu zuen «Udaleko sail ezberdinen arteko elkarlanaren emaitza» izan dela egitasmoa: kultura, parekidetasuna, zerbitzu sozialak, gazteria, turismoa, euskera, hezkuntza... Teknikari eta zinegotzi desberdinak egon ziren aurkezpenean. «Helburua da, udaran Hernaniko aisialdi eskaintza zabaltzea, haur, gazte eta helduentzat; eta gainera, naturarekin uztartuz, Ave Maria parkea bezalako paraje batean».
Hiru egunetan zehar, afari-merienda egin daiteke parkean. Lakari kooperatibak, jakiak salduko ditu parkean bertan.