Aurreko asteazkenean hasi zen, Hernanin, Buruntzaldea Txapelketa. Pelotari hernaniarrek, asteburuan izan dituzte estreinako partiduak; eta ondo ekin diote txapelketari: jokatutako lau partiduetatik, hiru irabazi dituzte.
Jubeniletan, bi bikoteek lortu zuten garaipena: Arizmendi eta Insausti, 18-4 nagusitu ziren, Gaztelekuko Huitzi eta Olanoren kontra; eta Salaberriak eta Zugastik, 18-17 irabazi zieten Pagazpeko Galarraga eta Urbietari. Kadeteetan, berriz, Jarak eta Lasak lortu zuten garaipena, Gaztelekuko Arrillaga eta Uriaren kontra (18-7); baina, aldiz, galdu egin zuten Insausti IIk eta Etxarrik, Oiarpeko Aranburu eta Elgerrestaren kontra (12-18).
Hiruna partidu Hernanin, gaur eta asteazkenean
Gaur bertan segiko du txapelketak, beste hiru partidurekin, 18:00etan hasita kiroldegiko frontoian. Aurrena, sailkapen faseko bigarren partidua jokatuko dute, Arizmendik eta Insaustik, Oiarpeko Azpiroz eta Salaberriaren kontra. Eta segidan, Pagazpeko Albeniz-Iruretagoiena, Zestoako Oteiza-Salegiren kontra; eta Tolosako Beloki-Biain, Epleko Taberna-Mitxelenaren kontra.
Asteazkenean izango dira beste hiru partidu, 18:00etan kiroldegiko frontoian; eta hiruetan jokatuko dute hernaniarrek: Oiartzabal eta Albeniz II kadeteak, Getariako Eizagirre eta Beristainen kontra; Jara eta Lasa kadeteak, Oiarpeko Aranburu eta Elgerrestaren kontra; eta Cisneros eta Arizmendi nagusiak, Gaztelekuko Ezeiza eta Arrateren kontra.