Atzo ekin zion Hernaniko Maialen traineruak, Donostiako Kontxako uretan, ETE ligari; Emakumeen Traineru Elkartearen ligari. Eta seigarren postuarekin hasi dute liga, hernaniarrek, bederatzi traineruren artean.
Bere txandan bigarren izan ziren, 12:23 denborarekin, Tolosaldearen atzetik, 26 segundura. Lea Artibai utzi zuten atzetik, segundu bat baino gutxiagora, eta baita Lapurdi eta Colindres ere.
Baina faboritoen txandako lau traineruek, pronostikoak bete zituzten, eta Hernaniren aurretik izan ziren lauak. Donostiarra izan zen onena etxean, eta beraien bandera irabazi zuten; Donostiarra Kaiarriba bandera. 16 segunduko aldea lortu zuten Deustorekin, eta 20 segundukoa Hibaikarekin. Hernanik, minutu bat galdu zuen juxtu, irabazlearekin.
Gipuzkoako Txapelketa, etzi
Gertu daukate hernaniarrek, hurrengo estropada ere. Baina oraingoa, ez da ligako bigarren jardunaldia izango, Gipuzkoako Txapelketa baizik.
Mutrikun ariko da Maialen etzi, asteazkenarekin, arratsaldeko 18:30etan hasita.