Azkeneko momentuan ihes, txapelak

Ezin berdinduagoa izan zen atzo, Europako Taldekako Txa­pelketaren finala, 30 metroko frontoian; eta azkeneko mo­mentuan, ihes egin zion txa­pelak, Hernaniri.
Desenpatean galdu zuten finala, Amaia Irazustabarrenak eta Maider Mendizabalek, La­purdiko Urruñarrak taldearen kontra. Eta iaz bezala, garai­pen haundiaren ateetan gera­tu ziren, joan den urteko txa­peldun beraren aurrean.
Lapurtarrek irabazi zuten aurreneko seta (10-15). Pelota hautsi egin zen orduan, eta bigarren setean, pelota berria­re­kin, gustorago aritu ziren her­naniarrak; baita partidua berdindu ere, 15-5 irabazita.
Baina ezin izan zituzten lanak borobildu, desenpatean. Aurretik hasi ziren, 4-2 aurre­na, eta 5-4 gero. Baina orduan, bere maila onena erakutsi, eta bost tanto egin zituzten segi­dan, lapurtarrek. 5-9ra joan zi­ren zuzenean, eta horrekin, ia erabakita utzi zuten parti­dua. Eta hala ere, ez zuten amore eman hernaniarrek.
Beraien lanari eutsi, sakea berreskuratu, eta 8garren tan­to­ra iristea lortu zuten, tanto bakarrera jarrita. Baina hortxe bukatu ziren hernaniarren esperantzak. Azke­neko tantoa egin zuten urruñarrek, eta bere aldera eraman zuten txapela, 8-10 irabazita.
Ikusleek, behintzat, gozatu ederra hartuko zu­ten, sekulako maila izan baitzuen finalak.