Urruti izan zuen Hernanik, aurreko asteburuan, Euskotren Ligarako txartela; eta beraz, ETE ligan, Emakumeen Traineru Elkartearen ligan, ariko dira uda honetan. Gaur bertan ekingo diote ligari, Donostiako Kontxan jokatuko den estropadan: Emakumeen Donostiarra Kaiarriba bandera izango da jokoan, goizeko 10:30etan.
Beste zortzi trainerurekin ariko da Hernaniko Maialen: Colindres, Deusto-Bilbao, Donostiarra, Hibaika, Kaiku, Lea Artibai, Lapurdi eta Tolosaldea. Bost traineru ariko dira aurreneko txandan, eta beste lauak bigarrenean.
Eta oraingoan bai, onenetatik gertuago egon nahi dute hernaniarrek. Guztira, 14 estropada izango ditu ETE ligak, eta astebururo izango dute lehia.
Datorren asteazkenean, gainera, Gipuzkoako Txapelketan izango dira hernaniarrak; arratsaldeko 18:30etan, Mutrikun.