Ebatzi berri ditu Hernaniko Udalak, etxebizitzen alokairua sustatzeko azkeneko deialdiaren eskaerak. Eta jakinarazi du, jasotako 73 eskaeretatik, 60 onartu dituztela.
Guztira, 135.525 euro emango ditu Udalak, dirulaguntzen deialdi honetan; eta beraz, eskaera bakoitzak, 2.258 euro jasoko ditu urtean, batazbeste.
Behin ebatzita, orain Udala jakinarazpenak bidaltzen ari zaizkie dirulaguntzen onuradunei, beharrezko dokumentazioa aurkeztu dezaten.
Eskatzaile gehienak, 35 urtetik beherakoak eta emakumezkoak
Eskatzaileen profilari dagokionez, azaldu dute onartutako 60 eskaera horietatik, gehienak 35 urtetik beherako gazteek egin dituztela: 47 eskaera, hain justu; eskaeren %78,33a. 85 lagun dira, dirulaguntza horietaz baliatuko direnak, eta gehienak emakumezkoak dira: %64,7a, hain zuzen ere.
Etxebizitzen kokapenari dagokionez, berriz, kontratuen ia erdia (%48,6) Kaxkoan daude; eta Latsunbeberri eta Antziola auzoak dira hurrengoak (%7,14).